Skip to content

الكتاب هذا خيبة أمل كبيرة. كاينو مسودة متاع كتاب ما تعداتش على éditeur. باش نبدى بإلي عجبني فيه: شوية الخرافات المتواترة إلي تحكي على حمام الذهب و حكايات اليهود في تونس و إلي عاشوه من معاناة و صراعات على مر السنين. الكتاب كان ينجم يكون هايل كان اقتصر على هالجانبين و تعمق فيهم تاريخيا أكثر، لذا نسبة "كتاب تاريخي'' حسب رايي ما تنطبقش عليه. بالنسبة للباقي، حسيت إلي الحكاية مشتتة و برشا شخصيات ما كانوش لازمين و ما أضافو شي للحبكة، إلي حتى كيف كملت الكتاب مزلت ما فهمتهاش شنية. لا قصة حب، لا بحث على كنوزات، لا الوضعية الخانقة في بعض الجهات، لا القمع... هذا الكل تعرضلو الكاتب بطريقة سطحية و حتى شخصياتو بقات سطحية مهما تعمقت في الحكاية. و عندي مشكل آخر، يمكن باش يظهر لا أساس له، أما القوة متاع الmale gaze في الكتاب حاجة تدوخ. الشخصيات النساءية الكل يتم وصفهم حسب المؤخرة، النهدين، بياض البشرة، حالة الإهتياج (الجنسي)، كيفاش كبيرة و مزالت لاهية بروحها، إلخ... شوية شيرا و هيلين توصفو بأكثر عمق تجاوز البعد الجسدي البحت. الحاصل كيما قلت، خيبة أمل و مضيعة وقت، برشا مرات حبيت نسلم فيه و قعدت نقول يمكن باش يتحسن. حتى النهاية كانت نهاية ركيكة، cliché، يمكن هدفها خلق مفاجأة أخيرة و لكن فشلت.